MYTHES, LITTERATURE ET SOCIETE

 

LE MYTHE D'ICARE

CHAPITRE L

COMMENT DOIBT ESTRE PREPARE ET MIS EN OEUVRE LE CELEBRE PANTAGRUELION.

On pare* le Pantagruelion soubs l'oequinocte automnal en diverses manieres, scelon la phantasie des peuples et diversité des pays.
L'enseignement premier de Pantagruel feut le tige d'icelle* devestir de feueilles et semence, le macerer en eaue stagnante, non courante, par cinq jours, si le temps est sec et l'eaue chaulde, par neuf ou douze, si le temps est nubileux* et l'eaue froyde; puys au soleil le seicher, puys à 1'umbre* le excorticquer* et separer les fibres (es quelles*, comne avons dict, consiste tout son pris et valeur) de la partie ligneuse, laquelle est inutile, fors* qu'à faire flambe lumineuse, allumer le feu et, pour l'esbat des petitz enfans, enfler les vessies de porc*. ( ... )

CHAPITRE LI

POURQUOY EST DICTE PANTAGRUELION, ET DES ADMIRABLES VERTUS* D'ICELLE.

(...)

Si promptement voulez guerir une bruslure, soit d'eaue, soit de feu, applicquez y du Pantagruelion crud, c'est à dire tel qui naist de terre, sans aultre appareil ne composition, et ayez esguard* de le changer ainsi que le voirez deseichant sus le mal.
Sans elle seroient les cuisines infâmes*, les tables detestables, quoy que couvertes feussent de toutes viandes* exquises, les lictz sans delices, quoy que y feust en abondance or, argent, electre*, ivoyre et porphyre.
Sans elle ne porteroient les meusniers bled au moulin, n'en rapporteroient farine. Sans elle, comment seroient portez les playdoiers des advocatz à l'auditoire ? Comment seroit sans elle porté le plastre à l'hastellier ? Sans elle, comment seroit tirée l'eaue du puyz ? Sans elle, que feroient les tabellions, les copistes, les secretaires et escrivains ? Ne periroient les pantarques et papiers rantiers ? Ne periroit le noble art d'imprimerie ? De quoy feroit on chassis ? Comment sonneroit on les cloches ? D'elle sont les Isiacques ornez, les Pastophores revestuz, toute humaine nature couverte en premiere position. Toutes les arbres lanificques* des Seres*, les gossampines* de Tyle* en la mer Persicque, les cynes* des Arabes, les vignes de Malthe ne vestissent tant de persones que faict ceste herbe seulette. Couvre les armées contre le froid et la pluye, plus certes commodement que jadis ne faisoient les peaulx; couvre les theatres et amphitheatres contre la chaleur, ceinct les boys et taillis au plaisir des chasseurs, descend en eaue, tant doulce que marine, au profict des pescheurs. Par elle sont bottes, botines, botasses, houzeaulx, brodequins, souliers, escarpins, pantofles, savattes mises en forme et usaige. Par elle sont les arcs tendus, les arbelestes bandées, les fondes faictes. Et, comne si feust herbe sacre, verbenicque* et révérée des Manes* et Lemures*, les corps humains mors sans elle ne sont inhumez.
Je diray plus. Icelle herbe moyenante, les substances invisibles visiblement sont arrestées, prinses, détenues et comme en prison mises; à leur prinse et arrest sont les grosses et pesantes moles tournées agillement à insigne profict de la vie humaine. Et m'esbahys comment l'invention de tel usaige a esté par tant de siecles celé aux antiques Philosophes, veue l'utilité impreciable qui en provient, veu le labeur intolérable que sans elle ilz supportoient en leurs pistrines.
Icelle moyenant, par la rétention des flotz aërez sont les grosses orchades, les amples thalameges, les fors guallions, les naufz chiliandres et myriandres de leurs stations enlevées et poussées à l'arbitre de leurs gouverneurs*.
Icelle moyenant, sont les nations que Nature sembloit tenir absconses*, imperméables et incongneues à nous venues, nous à elles : chose que ne feroient les oyseaulx, quelque legiereté de pennaige* qu'ilz ayent et quelque liberté de nager en Faër* que leurs soit baillée par Nature. Taprobana a veu Lappia; Java a veu les mons Riphées; Phebol voyra Theleme; les Islandoys et Engronelands boyront Euphrates; par elle Boreas* a veu le manoir de Auster*, Eurus* a visité Zephire*. De mode que les Intelligences celestes, les Dieux, tant marins que terrestres, en ont esté tous effrayez, voyans par l'usaige de cestui benedict Pantagruelion les peuples Arcticques en plein aspect des Antarcticques franchir la mer Athlanticque, passer les deux Tropicques, volter sous la Zone torride, mesurer tout le Zodiacque, s'esbatre soubs l'AEquinoctial, avoir l'un et Faultre Pole en veue à fleur de leur orizon.
Les Dieux Olympicques ont en pareil effroy dict :
"Pantagruel. nous a mis en pensement nouveau et tedieux*, plus que oncques ne feirent les Aloïdes*, par l'usaige et vertus de son herbe. Il sera de brief marié, de sa femme aura enfans. A ceste destinée ne povons nous contrevenir, car elle est passée par les mains et fuseaulx des soeurs fatales, filles de Nécessité. Par ses enfans (peut estre) sera inventée herbe de semblable énergie, moyenant laquelle pourront les humains visiter les sources des gresles, les bondes des pluyes et l'officine des fouldres, pourront envahir les régions de la Lune, entrer le teritoire des signes celestes et là prendre logis, les uns à l'Aigle d'or, les aultres au Mouton, les aultres à la Couronne, les aultres à la Herpe, les aultres au Lion d'argent, s'asseoir à table avecques nous, et nos déesses prendre à femmes, qui sont les seulx moyens d'estre déifiez.
En fin ont mis le remede de y obvier en délibération et au conseil.

RETOUR : Début du Texte

LE MYTHE D'ICARE	Liste
	Suite
	Menu